This article was Published at: 16-04-2009 and has been viewed 212 times

Qaramada Midoobay ayaa si kulul u cambaaraysay falaka Burcad badeednada ee ku sii badanaya Xeebaha Soomaaliya xili Burcad badeednu ay kordhisay falalkaasi.

Ergayga gaarka ah ee Qaramada Midoway u Qaabilsan Arrimaha Soomaaliya, Ahmedou Ould-Abdallah ayaa sheegay in falkan burcad badeednimada ah uu noqday masiibo caalami ah oo dhaawacaaya muwaadiniinta Caalamka iyo kuwa Soomaaliyeed ee gobolka iyo aduunkaba.

"Waxaan si aad ah u aaminsanahay in talaabooyinka  la taaban karo ee ku aadan joogteynta iyo soo kordhinta tirada maraakiibta caalamiga ah ee jooga dhulka xeebaha Soomaaliya ka baxsani ay yareyn doonto, ciriirina gelin doonto falka buracad badeednimada” ayuu yiri Axmedou Ould-Abdallah.

"Haddii maraakiibtan caalamiga ah ayna joogi lahayn  masiibada burcad badeednimada la xiriirta intan waa ka xumaan lahayd" ayuu sii raaciyey.

"Dalalka ka qeybqaadanaya joogitaanka ciimada caalamiga ah  waxay qabanayaa shaqo aad u haboon, laakiinse dhulka la rabo inay ka howlgalaan ayaa aad u weyn, falkii is difaacida ahaa ee ay dhowaan   fuliyeen dawladaha USA iyo France waxay farriin adag ah u dirasaa burcad-badeedka gaar ahaan kuwa taageera ee ka faa'deysanaya  masaakiinimada iyo rajo la'aanta haysata dhalinyaradooda shaqada la'aanta ah" ayuu sii daba dhigay Ould-Abdallah.

Ergayga gaarka ah ee qaramada Midoobay u qaabilsan Soomaaliya waxaa uu yiri maanta ugu yaraan 300-ruux iyo 17-markab ayaa waxaa afduub u haysta koox yar oo dantoodu keliya ay tahay inay   si sharci darro ah faa'iido u kororsadaan, haddaba in la helo xal ciidan waa muhiim waana in arintan barbar socotaa hurumarin la taaban karo ee  dhinaca shaqo abuurista iyo horumarka ah.

"Si loo xaqiijiyo in xasilooni loo helo Soomaaliya, wadamada gobolka iyo xuriyadda biyo-mareenadaba waa in si dhaqsi leh loo tilmaamaa lalana xisaabtamaa  kuwa dhaqaale ahaan kaalmeeya burcad badeednimada" ayuu hadalkiisa ku soo gaba gabeeyay Axmedou Ould-Abdallah.

Hadalka ergayga gaarka ee Qaramada Midoobaya ayaa kusoo aadaya xilli maalmihii u dambeeyay kooxaha burcad badeeda ay sii xoojiyeen falalka ay ku qafaalanayaan maraakiibta shisheeye ee maraysa Biyaha Soomaaliya iyo gacanka Cadmeed.